Language   

Adieu ch'terril d'Rimbert

Simon Colliez
Language: French (Chtimi)



T'étos là comme einne montagne bien à plache
Té faisos parti éd'nou paysache
Qui'd'nous pères i aurot pinsé que ch'terril
Par un bieau jour i s'rot évanoui
Bien mes pauf' gins, i faudra bien s'y faire
Y'a disparu min viux terril d'Rimbert
Bien mes pauf' gins, i faudra bien s'y faire
Y'a disparu min viux terril d'Rimbert.

Quand j'étos gosse euj'grimpos sur tin dos
Si'y'avot pas d'garte, vite in s'faufilot
Parmi ches rals, ches aiguillaches, ches bos
Et tout l'fourbi qui traînot sus l'carreau
Et in grimpot tout in haut dans l'poussière
Y'a disparu min viux terril d'Rimbert
Et in grimpot tout in haut dans l'poussière
Y'a disparu min viux terril d'Rimbert.

T'étos un témoin d'l'ouvrache éd'nos pères
Qui ont ouvré tout leu vie éd'sous l'terre
Pour t'construire y'a fallu plus d'cent vingt ans
Et ravisse in n'parle plus d'ti in rien d'temps
T'es parti rogné par ches bulldozers
J'te dis adieu min viux d'terril d'Rimbert.

J'restos juste in face quand j'n'étos qu'un jonne
J'ravisos monter, déchinte eul'crinquonne
Ches berlines s'croisottent toudis à'l'même plache
Et tout'l'journée faire leu remue-ménache
Pour aller baller in haut l'mécante terre
Et dire qu'i'est parti min terril d'Rimbert
Pour aller baller in haut l'mécante terre
Et dire qu'i'est parti min terril d'Rimbert.

J'souris quand même parce que j'pinse à quitte cosse
Tous ches gins qui s'sont faits mourir à'l'fosse
Is n's'doutottent pas in armontant ch'carbon
Que'l'terre servirot à leu tits garchons
Is n'in frottent eune tchiête nous arrière-grinds-pères
Éd'vir qu'i n'existe pus ch'terril d'Rimbert
Is n'in frottent eune tchiête nous arrière-grinds-pères
Éd'vir qu'i n'existe pus ch'terril d'Rimbert.

T'étos un témoin d'l'ouvrache éd'nos pères
Qui ont ouvré tout leu vie éd'sous l'terre
Pour t'construire y'a fallu plus d'cent vingt ans
Et ravisse in n'parle plus d'ti in rien d'temps
T'es parti rogné par ches bulldozers
J'te dis adieu min viux d'terril d'Rimbert.

Ches éfants et pitits éfants d'mineurs
Is veulent du schiste dins z'allées d'leu demeure
Quand is partent in vacances sur l'autoroute
J'eun'cros pas qu'y'n'a gramint qui s'doutent
Que'l'montagne alle est sous ches reules à terre
Ch'est là qu't'es parti min terril d'Rimbert
Que'l'montagne alle est sous ches reules à terre
Ch'est là qu't'es parti min terril d'Rimbert.

T'étos un témoin d'l'ouvrache éd'nos pères
Qui ont ouvré tout leu vie éd'sous l'terre
Pour t'construire y'a fallu plus d'cent vingt ans
Et ravisse in n'parle plus d'ti in rien d'temps
T'es parti rogné par ches bulldozers
J'te dis adieu min viux d'terril d'Rimbert.


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org