Lingua   

Si chista è Pasqua

Alfredo Corsaro
Lingua: Siciliano


Ti può interessare anche...

La me liti
(Rosa Balistreri)
Li culura da bannera
(Alfredo Corsaro)
L’albiru
(Fratelli Mancuso)


Scritta la domenica delle palme del 2018 sulla guerra settennale in Siria
25 marzu duminica de’ parmi
Quarcunu avennu fattu pinitenza
Aspetta o primu aprili a festa ranni
Tant’autri ccu tanta ‘ndiffirenza

Ppi tanti ‘a Pasqua è 'ndivirtimentu
S’affannunu a pinsari a lu mangiari
Non pensunu a lu mali ‘nta lu munnu
Ca tanta genti cunnanna a simpurtari

Fami, ricchizzi, odiu e rancuri
Sunnu li causi ca fannu tantu mali
E troppa genti soffri li torturi
Di tanti guerri feroci e criminali

C’e’ cu scappa di li guerra ‘nfami
Ppi sarvaricci ‘a vita a li so figghi
E cu scappa ppi li stenti e ppi la fami
A circari ‘npezz’i pani pp’i famigghi

Nun c'è jancu, nun c’è niuru ‘na svintura
Nun c’è patri, matri e mancu figghi
La bumma non vidi affetti né culura
E a genti l’arridduci a munuzzagghi

E mentri chistu e’ chiddu ca succedi
Beati, sazii e tutti spinsirati
Ni priparamu a festa ccu tanta fidi
Senza pinsari a tutt’i dispirati

PP’i genti ccu li bummi supr’a testa
Dicitimi si cchista si po’ diri festa
Nun vi girati di dda banna a testa
Gridati finalmenti : ora basta!

Circati li ricchi e li putenti
Ntappaticci la testa mura mura
livaticci l’agneddu di li denti
Ittaticci dda ‘nterra carni dura

Chisti non sunnu omini ma cani
Ca c’intaressa l’oru e li ricchizzi
Non pensunu c’ammazzunu cristiani
E pasciunu ‘nta l’aggiu e ‘ntra li vizzii

Spugghiativi di sta peddi d’animali
E suddu aviti ancora ‘na cuscenza
lassannu ‘n’jornu tuttu ‘st’arsanali
pinsati c’at’a ffari pinitenza

Pinsati a chisti poviri cristiani
Ca si sta guerra ancora non finisci
Nun c’e’ ppi d’iddi toccu di campani
E mancu c’e’ lu Cristu c’abbrivisci!

inviata da Alfredo Corsaro - 4/5/2018 - 09:57



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org