Lingua   

Per fols tenc Polhes e Lombartz

Pèire Cardenal



Per fols tenc Polhes e Lombartz
E Longobartz et Alamans
Si volon Frances ni Picartz
A senhors ni a drogomans,
Car murtrir a tòrt
Tenon a depòrt,
E ieu non lau réi
Qui non garda léi. ‎

Et aura-ill ops bos estendartz
E que fiera mielhs que Rotlans
E que sapcha mais que Rainartz
Et aía mais que Corbarans
E tema meins mort
Que-l coms de Monfort,
Si vol qu'ab barrei
Lo mons li soplei

E sabetz qual sera sa partz
De las guerras e dels mazans ?
Lo cels e-l paors e-l regartz
Qu'el aura faitz e-l dols e-l dans
Seran sieu per sort;
D'aitan lo conort
Quab aital charrei
Vendra del tornei. ‎

Hom, petit val tos sens ni t'artz
Si pertz t'arma per tos efans,
Per l'autrui carbonada t'artz
E l'autrui repaus t'es afans:
Pois vas a tal port
On cre qu'usquecx port
L'engan e-l trafei
E-ls tortz faitz que fei. ‎

Anc Carles Martels ni Girartz
Ni Marsilis ni Agolans
Ni-l reis Gormons ni Izembartz
Non aussizeron d'omes tans
Que n'aion estort
Lo valen d'un ort,
Ni non lur en vei
Aver ni arnei. ‎

Non cre qu'a la mort
Negus plus en port
Aver ni arnei
Mas los faitz que fei. ‎


Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org