Lingua   

La cuda, qualchi vota, si fa testa

Francesco "Ciccio" Giuffrida
Lingua: Siciliano



Vistu ca 'nta la casa do' mischinu
cu arriva arriva cumanna e fa festa
ccu angherii e supprusi di cuntinu…
la cuda qualchi vota si fa testa

Vistu c'avemu st'amaru distinu
di faticari e po' nenti n'arresta
sempri aspittannu l'aiutu divinu…
la cuda qualchi vota si fa testa

Vistu c'amu arristari all'abbuccuni
sutta lu suli e sutta la timpesta
e c'è cu mancia e vivi all'ammucciuni…
la cuda qualchi vota si fa testa

Vistu ca 'a terra fussi 'i cu la zappa
scrivi 'u nutaru ccu la manu lesta
cussì si nni 'mpussessa cu havi cappa…
la cuda qualchi vota si fa testa

Vistu ca forti 'ncarca lu baruni
e 'a nostra vita ni l'attassa e 'mpesta
e la putenza caca a la ragiuni…
la cuda qualchi vota si fa testa

Vistu ca ni mannati sbirri e vai
ppi supirchiari cu è persona onesta
e abbentu non putemu aviri mai…
la cuda qualchi vota si fa testa


Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org