Lingua   

Arrivaru i Cammisi

Vincenzo Lo Iacono
Lingua: Siciliano



Arrivaru i cammisi e manciamu brudagghia
nn’arrivaru un munzeddu accavaddu a nu sceccu
senza frenu e ne pagghia
e srinceru i Bruntisi commu un ferru a tinagghia
spurtusaru i vudedda d’un poviru cristu
‘nta sta terra bastarda, ‘nta sta terra bastarda

Arrivaru i cammisi e ghiuttemu sputazza
cu di panzi a purceddu scannaru n’agneddu
e su manciaru ‘nta chiazza
no lassaru na scagghia di sta terra sarvaggia
si futteru un paisi e zziccaru i Bruntisi
tutti dintra a na jargia, tutti dintra a na jargia

Arrivaru i cammisi e stu cauddu non passa
sti fitenti lassaru a ogni casa na cruci
e n’un fetu i pisciazza
Sunnu tutti o casteddu abbraccettu e baruna
culu causi e cammisi cunsumaru un paisi
e nni misiru a gnuna, e nni misiru a gnuna
e nni misiru a gnuna

Arrivaru i cammisi mentri a fami nni mancia
ammulamu i cuteddi e cchiappamu i rasteddi
fracassamuci a panza
Sunnu chini i baruna, chini finu e cugghiuna
e ristaru i Bruntisi senza causi e cammisi
maliditti cammisi, maliditti cammisi

Arrivaru i cammisi e stu sangu no stagghia
aiutatinni ddiu a stutari stu focu
e firmati sta raggia
N’affucamu ‘nto vinu, p’asciucari u duluri
maliditti cammisi spugghiaru un paisi
e ora fannu i patruna e ora fannu i patruna

Terra russa sciaccata arrustuta du suli
quantu figghi ammazzaru je’ ‘nto munnizzaru
centu testi jttaru
Castigatili ddiu sti fitenti cammisi
‘nta sta terra spunnata e abbruciata du suli
no ni lassunu ‘npaci, no, no ni lassunu ‘npaci,
no ni lassunu ‘paci


Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org