Language   

Dr Parkingmeter

Mani Matter
Language: Alemannic (Bärndüüdsch)


Mani Matter


Bimne Parkingmeter ha
Ni mys Outo welle la,
Aber ha kes Zwänzgi gha
Für bim Gältschlitz ynezla.

“Ja, was machen ig jitz da...?”
Han i tänkt, i chönnti ja
Schnäll zur Poscht am Egge gah,
Mir es Zwänzgi wächsle z la.

Aber halt! De müesst i ja
Chönne ds Outo hie la stah,
Und zu däm Zwäck müesst i da
Zersch es Zwänzgi ynela.

Und es Zwänzgi han i ja
Äbe nid, i müessti da
Zersch zur Poscht am Egge gah,
Und mys Outo hie la stah.

Und für ds Outo hie la z stah
Müesst i zersch es Zwänzgi ha,
Und das isch was i nid ha...!
Wen i nid uf d Poscht cha gah.

Zwar uf d Poscht müesst i nid gah
Wen i ds Zwänzgi hätt, doch da
I das Zwänzgi ja nid ha
Chan i ds Outo nid la stah.

Und i cha kes Zwänzgi ha
Wil i nid uf d Poscht cha gah,
Und uf d Poscht chan i nid gah
Wil i ja kes Zwänzgi ha.

Bimne Parkingmeter ha
Ni mys Outo welle la,
Aber ha kes Zwänzgi gha
Und ha wider müesse gah.



Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org