Language   

Ballade VII: Je mercy Dieu de ses biens de sa grace

Eustache Deschamps




Je mercy Dieu de ses biens, de sa grace,
Qui m'a fourmé et fait a sa semblance,
Et des cinq sens qu'il m'assist en la face,
Par lesquelz j'ay parfaitte congnoissance
De bien, de mal, d'onneur et de vaillance,
Et des ars mondainement,
Par lesquelz tout a son gouvernement
Ce monde ci, ou l'en fine si tost.
Et puis qu'on y muert si soubdainement,
Jamais ne quier suir guerre ne ost.

Car Convoitier fait la guerre et amasse.
Vaine Gloire tient l'escu et la lance,
En assaillant tue, omicide et chace,
Contre raison son pechié a mort lance.
En deffendant a autre differance :
L'en seufre paine et tourment
De faim, de froit. L'en muert en un moment :
L'ame se part quant chascun pille et tost.
Mais, se ce n'est sur Sarrazine gent,
Jamais ne quier suir guerre ne ost.

Dieux commande que le labour se face,
Que nous l'amons, chascuns ait soufisance
En son estat, et que Justice efface
Les malfaitteurs qui font perseverance
En leurs meffaiz, et que nulz ne s'avance
D'acquerre mauvaisement
Terre d'autrui. Mais l'en fait autrement.
Si vueil des or vivre en un lieu devost,
Et pour plus tost faire mon sauvement,
Jamais ne quier suir guerre ne ost.

L'envoy

Princes, temps m'est de querir lieu et place
De Dieu servir : j'ay trop suy le rost.
Compter me fault, se temps ay et espace :
Jamais ne quier suir guerre ne ost.



Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org