Lingua   

Cantata cuntra la mafia

Ignazio Buttitta
Lingua: Siciliano


Ignazio Buttitta


La mafia non è la peste, non è la carestia
e nemmeno la guerra;
ma come la carestia, la peste
e la guerra, fa danni e semina morte.

Sicilia e mafia sunnu du' cosi
lu stissi comu diri spini e rosi;
du' cosi diffirenti pi natura
la mafia feti, e la Sicilia odura!

Li mafiosi un su' siciliani
sunnu razza bastarda comu i cani
non sunnu nostri amici e nè parenti
e in comuni non avemu nenti.

L'amici di la mafia su' certuni
all'apparenza nobili persuni
divoti di la fidi e di li santi
cu funzioni e ncarichi mpurtanti
ed hannu a Roma - evviva a capitali! -
sede fissa e quartiere generale.

Su' seculi c'ammolanu i scagghiuna
la mafia ngrassa e vuncia li primula
si mudirnizza, allarga li so riti
diventa dirigenti di partiti.

Tutti l'appalti e li cuncissioni
la mafia l'amministra e nni disponi
la mafia arrobba, la mafia siggi
la mafia suttametti a la so liggi.

La liggi di la mafia è la lupara
e a cu non piaci, la mafia ci spara
cu vidi e sapi, si non fa lu mutu
s'accatta a fossa e s'accatta u tabbutu.

P'amuri di la vita ognuno taci
e supporta la mafia in santa paci
non è omertà, non è vigliaccheria
si l'omu onestu un havi garanzia.

Lu mafiusu è garintutu e sapi
ca quannu ammazza currinu i so capi
i prutittura, li suttamarini
complici ed alliati a l'assassini
ca càncianu li carti e tempu un nenti
e l'assassinu diventa nnuccenti.

Sempre assolti: assolti per insufficienza di prove.
I cartellini pinali parranu!

Dici la mafia, si niscemu assolti
megghiu ammazzari e siminari morti
turnumu chiù rimuti a li paisi
viva la mafia e li corti d'Assisi!

Tornanu chiù timuti, si capisci
la fama avanza e lu prestigiu crisci
e la patente di “Coppula Torta”
comu un trofeu davanti la porta.

E nni li chiazzi - nsignu di rispettu -
passìanu cu lu sinnacu a brazzettu
e li parrini, pi fàrisi onuri
amici si ci fannu e cunfessuri
li fannu capi di lu cumitatu
e cunfunninu Cristu cu Pilatu.

Doppu tant'anni di sangu a timpesta
ora u guvernu dicisi l'Inchiesta
però sapemu li siciliani
ca è na farsa, e cani un mancia cani
e finirà ad opira di pupi!

Certu, c'avi a finiri ad opira di pupi
si nna "Commissione d'Inchiesta"
hannu a maggioranza i diputati e i sinatura mafiosi.
Ma i siciliani chi vonnu?

Vonnu ca la radica si tagghia
la radica, lu zuccu e la ramagghia
chi l'assassinu u chiamami assassinu
e u galantomu onesto citatine
e chi a mafia e i so amici putenti
si chiamassiru latri e dilinquenti.

E vonnu ajasari e setti celi
l'eroi di oggi e l'eroi d'aeri
l'eroi di la mafia ammazzati
pi dari ciatu a la libirtati
e fari da Sicilia e di stu celu
un paradisu nterra unicu e veru!



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org