Language   

Qui ve gran maleza faire

Pèire Cardenal



Qui ve gran maleza faire
De mal dir no si deu taire:
Per qu'ieu vuelh dir e retraire
Que ricx homs dezeretaire
Es piegers que autre laire,
E fai diablía
Peior que neguns raubaire,
E tart si castía. ‎

Ricx homs quan vai per carrèira,
El a una companhèira:
Malvestat, que vai premèira
E mejana e derrèira
E grantz Cobeitatz entèira
Li fai companhía
E Tortz porta la senhèira
Et Erguelhs la guía. ‎

Ricx homs mals quan vai en plassa,
Que cuiatz vos que lai fassa
Quant autr'homs ri e solassa,
A l'un mòu play, l'autre cassa
L'un maldi, l'autre menassa,
E l'autr'afollía
E non fai joi ni abrassa.
Si com far deuría. ‎

Ricx homs quan fai sas caléndas
E sas cortz e sas bevéndas,
De toutas e de rozendas
Fai sos dons e sas esméndas
E sos lums e sas offréndas,
E de raubaría
E en guerras met sas réndas
E en plaidería. ‎

Ricx homs mals quan vol far fèsta,
Aujatz consi faí sa quèsta:
Tant bat la gent e entèsta
Tro que deniers non lur rèsta
Que no-i cal venir tempèsta
Ni fams ni moría,
Pueis fai cara molt honèsta
Qui no-l conoissía. ‎

Un pauc ai dig de la gèsta
Que dire volía
Mas tan grans massa n'i rèsta
Que fort pauc embría.‎


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org