Language   

Tostemps vir cuidar en sabér

Pèire Cardenal



Tostemps vir cuidar en sabér
E camgi so cug per so sai,
E lais mentir per dire vér,
E azir tort e dretz mi plai,
E blasmi mal e lauzi bé,
E mostri gaug e dol escón,
E soi compaingz de bona fé
Car es ab me et ab leis són. ‎

Per so n'ai pezar e plazer
E m'en irais e m'en apai
E n'ai amor e mal voler
Ab tal que mal ni be non fai;
E per aco ieu am en re
Et azir en re cest d'amon:
Car en re fai so que-s cove
Et en re escorja e ton. ‎

Et per aco no-m puesc tener
Qu'ieu non diga d'aquel de lai
Que Dieus lo degra dequazer
Si com el los autres dequai,
E qu'el trobes aital merce
Com trobon aquil qu'el cofon.
Car los destrus non sap per que
E los fai fugir non sai on.‎

Si hom pogues lo cor vezer
Del malvais ric home savai
Tant i vir' hom d'avol aver
Que fera paor et esglai
Per que volgra, car hom no ve
Lo malvais voler deziron,
Que la malvestat qu'a en se
Portes escricha sus, el fron. ‎

Ricx homs malvais de gran poder
Que gent viest e manja e jai,
E non vol als autres valer,
Sembla lo ric que hom retrai,
Que, quar manjava ad esple
E vestía lo mieilz del mon
E non donava son conre,
Deissendet en enfer, preon. ‎

Las doas vías que hom te
Vos farai entendre cals son:
L'una fai mal, l'autra fai be,
L'una vai aval, l'autr' amon. ‎


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org