Language   

Cantone de su massaju-richiamadu

Frantziscu Màsala / Francesco Masala
Language: Sardinian



Deo so Barore Mérula,
fentomadu Animamia,
massaju de Arasolè,
soldadu-richiamadu,
mortu in Russia,
in nùmene de Deus e de sa Patria.
Cando fia in vida
aia duas manos
paris a duas palas
e una muzeredda bàscia e lanza
laribianca,
illierada ’e sette fizos
mandigadores de pane.
Seminaia a laore
una tanca in Campidanu.
Una die benzeit
unu printzipale fascista
a fagher sa parlada a sos massajos
subra de sa battàglia de su trigu.
Tzertu, bellas paràulas
nareit su fascista,
in limba italiana,
paràulas gai bellas, gai bellas
chi nisciunu de nois
bi cumprendeit nudda:

Andate, camerati contadini,
andate ai vostri campi
andate con l’aratro e con la spada,
in nome di Dio e della Patria,
andate e scagliate
le vostre anime nei solchi.


Finida sa parlada, leo su tzappu,
a su sòlitu, pro andare
a sa tanca ’e su laore.
Su printzipale abbàidat e mi faghet:
«Dove vai, camerata?»
Ando a che bettare
s’animamia in sos sulcos!
E pro cussu sa zente ’e Arasolè
mi at fentomadu Animamia.
Como s’ànima mia est inoghe,
intro de unu sulcu,
a pedes de un’àrvure bianca,
in su campusantu de gherra,
inoghe, in sas tancas de Russia.


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org