Lingua   

Lèyîz m' plorer

Nicolas Defrêcheux
Lingua: Walloon



Mes camèrådes m' ont vnou dîre: " C' est nosse fiesse,
vinez danser ! "
K' in ôte s' amûze, mi, dji pleure li mêtresse
ki m' a cwité.
Dji l' inméve tant ! elle aveut mes pinséyes
di nute et d' djoû
Lèyîz m' plorer ! tote mi veye est gåtéye,
dji l' a pièrdou, dji l' a pièrdou !

Ses ptitès mins avît l' minme blankixheur
ki nos feus d' lis
Et ses deus lèpes estît pus rôzes ki l' fleur
di nos rôzîs.
Måy nole fåbite n' a fêt oyi come leye
des tchants si doûs.
Lèyîz m' plorer ! tote mi veye est gåtéye,
dji l' a pièrdou, dji l' a pièrdou !

Vos årîz dit kéke andje vinou sol tère
divin l' moumint.
Ele pårtixhéve totes ses spågnes al mizére
des ôrfulins;
Ou k' elle êdîve si veye mére al vespréye
po rmonter l' soû
Lèyîz m' plorer ! tote mi veye est gåtéye,
dji l' a pièrdou, dji l' a pièrdou !

Dji n' pou roûvî k' el sêzon des violètes,
èle mi dérit:
Louke cès oûjhês apîstés sol coxhète...
Ki fiestèt i ?
Va, cwand on s' inme, tos les djoûs d' ine annéye
sont des bês djoûs,
Lèyîz m' plorer ! tote mi veye est gåtéye,
dji l' a pièrdou, dji l' a pièrdou !

Elle e-st asteure èco pus hôt k' les steules,
è paradis.
Pocwè fåt i k' èle seuye evôye tote seule,
èvôye sins mi ?
On a bê m' dîre: " I fåt bin k' t' el roûveyes ! "
Eski dj' el pou ?
Lèyîz m' plorer ! tote mi veye est gåtéye,
dji l' a pièrdou, dji l' a pièrdou !


Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org