Language   

'A Carneficina

Franco Trincale
Language: Sicilian




Era bedda , e sirena la iurnata
e di lu sulu tutta culurata
di pedi e manu testa e li capiddi
intulittati sunnu i picciriddi
vannu a la scola ppi lu so avviniri
non sannu ca ddu iornu hann ‘a muriri

Dda scola d’unni a vita pigghia volu
avi lu ventri chinu di tritolu
e i kamicazi ‘voti a lu tirruri
siquestrunu maestri e criaturi
li tinniru tri ghiorni e na matina
vo ficiru na gran carneficina

Di li corpi straziati ‘u sangu scurri
e di la terra schizza intra li mura
scappanu e fora cc’e’ lu curri curri
nudi affamati asciutti di l’arsura
ca ppi la siti e ‘a morti non patiri
‘a stissa orina sappunu a biviri

Chistu nonn’e’ cchiu’ munnu di umani
ci sunnu ogni ghiornu stragi immani
e putin busc chiddi do gi ottu
ragiuni ora si fannu ccu lu tortu
facennini sapiri picca e nenti
di lu pirchi’ sta stragi d’innuccenti

Ccu facci addulurata ora viniti
a visitari i morti e li firiti
ma lu duluri veru non sintiti
pirchi’ ‘a curazza ‘nto cori tiniti
e sta carneficina ca viditi
d’intr ‘a di la cuscenza cci l’aviti

O capi di lu munnu omini granni
vui nunn’aviti cori comu a d’iddi
chiddi chi ora squartanu la carni
e ll’innuccenza di li picciriddi
iu ora m’addumannu e mi cunfunnu
cu sunnu i terroristi di stu munnu

Mi l’addumannu e nuddu m’arrispunni
pirchi’ lu terrurismu e’ in ogni d’unni
ci fu’ nell’Algeria, nell’Irlanda
in Spagna ccu li baschi e in terra santa
nta Palestina si fannu scuppiari
pirchi’ ‘Israele a terra un ‘ci vo’ ddari

Videmu ogni ghiornu ‘stu macellu
d’intra lu schermu da televisioni
n’abituamu l’occhi e lu cirvellu
mangiannu senza fari indigestioni
che quizz d’Amadeus demenziali
e la minestra do telegiornali

Mittemu na cannila a la finestra
‘ppinnemu la bannera a lu barcuni
cci damu qualchi sordu ppa minestra
a chiddu c’addimanna ‘gnuni ‘gnuni
e nuautri ni purgamu la cuscenza
mentri ca ‘umunnu, l’autru e in penitenza

E iu vaiu musicannu , cuntu e cantu
a vvoti ccu lu viaggiu prepagatu
sapenno ca ogni ‘istanti ca iu cantu
un picciriddu mori u "cantu cantu"
mentri ca la cuscenza di ‘n’agnuni
mi dici nunn’e’ tempu di canzuni

A ‘sta cuscenza mia marturiata
iu c’arrispunnu canta nta la strata
pirchi’ finu ca n’omu a mia m’ascuta
la nostra lotta non e’ mai pirduta
cuntinuu a cantari finu a‘nfunnu
contru ‘i latruni capi di stu munnu.



Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org