Canzoniere Popolare Veneto

Canzoniere Popolare Veneto el xe un grupo musical che ga avuo origine da Gualtiero Bertelli e Luisa Ronchini che se ga conossuo nel 1964. El primo spetacolo de lori dò xe stà "Partigiano sconosciuto" (Partigiano sconossuo). El grupo ga ciapà el nome Cansonier Popolar Veneto quando a lori se ga po zontà Alberto D'Amico, Tiziano Bertelli (fradelo de Gualtiero), Rosanna Trolese, Renzo Bonometto e Linda Caorlin.
El grupo se ga impegnà nela riserca e nel studio dele cansoni popolari venete e xe esistio fin al 1971 quando che 'l se ga spacà in do grupi novi: uno che ga mantegnìo el nome (D’Amico, Ronchini, Magro), staltro che se ga ciamà Novo Cansonier Veneto (in un primo momento co i dò Bertelli, Maria Boccanegra, Bonometto, Caorlin e Benni Sima; pì vanti a Gualtiero Bertelli se ga zontà S. M. Ricatti, D. Borsetto, F. Armirati e I. Korman).
Da ricordar lo spetacolo "Tera e Aqua" che xe finìo po nel disco "Addio Venezia addio": qua, al posto de D'Amico che gaveva sbarufà col grupo par la linea da seguir, ghe xe par un fià de tempo Policarpo Lanzi.

http://vec.wikipedia.org/wiki/Canzonie...
http://digilander.libero.it/gianni61dg...