Lingua   

De rerum natura Liber V, 1283-1307

Tito Lucrezio Caro / Titus Lucretius Carus
Lingua: Latino




[1283] Arma antiqua manus ungues dentesque fuerunt
et lapides et item silvarum fragmina rami,
[1285] et flamma atque ignes, postquam sunt cognita primum.
Posterius ferri vis est aerisque reperta.
Et prior aeris erat quam ferri cognitus usus,
quo facilis magis est natura et copia maior.
Aere solum terrae tractabant, aereque belli
[1290] miscebant fluctus et vulnera vasta serebant
et pecus atque agros adimebant. Nam facile ollis
omnia cedebant armatis nuda et inerma.
Inde minutatim processit ferreus ensis
versaque in opprobrium species est falcis aƫnae,
[1295] et ferro coepere solum proscindere terrae
exaequataque sunt creperi certamina belli.
Et prius est armatum in equi conscendere costas
et moderarier hunc frenis dextraque vigere
quam biiugo curru belli temptare pericla.
[1300] Et biiugos prius est quam bis coniungere binos
et quam falciferos armatum escendere currus.
Inde boves lucas turrito corpore, taetras,
anguimanus, belli docuerunt vulnera Poeni
sufferre et magnas Martis turbare catervas.
[1305] Sic alid ex alio peperit discordia tristis,
horribile humanis quod gentibus esset in armis,
[1307] inque dies belli terroribus addidit augmen.



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org