Lingua   

Tù ch'eri partutu

Tavagna
Lingua: Corso


Tavagna


Tù chì eri partutu in festa
U core colmu da sperenza,
Da tanta la fratellenza
Centu mila soli in testa

Tù chì cridie li mondi
Fatti à matinate belle
Da ogni culor’di pelle
Per ogni chjam’è rispondi

Tù chì sempre fusti bravu
Cù la ghjente malavviata
Nant’à la via straziata
D’umanu populu schjavu

In chì ortu addurmintata
È sottu à chì paisaghju
In fine di lu viaghju
A to vita s’hè firmata?

T’anu vistutu di pannu
Di lu verde militare,
Di quellu d’inguernu in mare
Quandì l’acqua dà l’affannu

T’anu armatu di fucili
È pinzute bagliunette
À lu son’di e trumbette
In l’aria cum’è staffili

T’anu fattu fà le prove,
T’anu amparatu la guerra
Cù le manovre di terra
Ch’ellu nevi o ch’ellu piovi

Quanti funu regimenti,
Quanti funu battaglioni
À cullà guasi à pasponi
Versu li macelli ardenti?

Quanti funu omi valenti,
Quanti funu i camerati
Chì cun tè ne sò cascati
Sottu un celu di spaventi?

Quanti cum’è tè in ritrattu
Sò nant’à vechje cumode
Ch’ùn ponu cantà e lode
D’ogni guerrieru fattu?



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org