Lingua   

Proverbi siciliani

Rosa Balistreri
Lingua: Siciliano


Rosa Balistreri


Tutti li cosi vannu a lu pinninu
ed a lu peju 'un ci si 'nclina ognunu
a cu duna a cu leva lu distinu
e nun ci pari mai.. lu nostru dunu.

Nun curri paru lu nostru caminu
pocu cridi lu saggiu a l'importunu
lu riccu mancu cridi a lu mischinu
lu saziu nun cridi a lu.. dijunu.

Pi troppu ventu lu vasceddu sferra
pi la gran frevi lu malatu sparra
p'assai cunsigli si perdi la guerra
e pi tanti giudizii si sgarra.

Lauda lu mari e teniti a la terra
pensa la cosa prima ca si sparra
picchì haju ntisu diri a la me terra
cu fa li cosi giusti mai li sgarra.

A chiànciri figghiuzza chi cci cavi
lu sangu t'arribbelli e po' murìri
pacenzia ci voli a li burraschi
ca nun si mancia meli senza.. muschi.

Ma cu du' lepri voli assicutari
nè unu e nè l'autru po' aggarrari
ma cu nun fa lu gruppu a la gugliata
perdi lu cuntu cchiù di na vota.

Ci dissi lu jadduzzu a la puddastra
tuttu lu munnu è comu casa nostra
ci dissi la padedda a la gradiglia
haju pisci grossi mancia e no.. fragaglia.

Accosta veni ccà mancia carduna
ca a lu casteddu mancianu picciuna
rispunni e dici lu ziu Nicola
si la pignata 'un vugghj, nun.. si cala.

Lu picuraru ca fa la ricotta
lu sapi iddu l'amici c'aspetta
la furca nun è fatta pi lu riccu
è fatta pi la testa di... lu porcu.

E nni la testa d'un maiali
tu ci manci tu ci sciali
nni la testa d'un cunigghiu
nenti lassu e nenti pigghiu.

Timpirateddu ti vivi lu vinu
ca ti teni lu stomacu 'n tonu
cu ammucciau lu latinu
fu gnuranza di parrinu.

'Un c'è festa e né fistinu
si 'un c'è un monacu e un parrinu
ma lu monacu da Badia
a Gesù lu patrunia.

C'è la monica di casa
a Gesù lu stringi e vasa
nni la casa di Gesù
nzoccu trasi 'un nesci chiù.

Ma.. cu havi na bona vigna
havi pani, vinu e ligna
e lu trivuli e lu beni
cu cci l'havi si lu teni.

Quannu chiovi di matina
pigghia l'aratru e và simìna
quannu veni lu giugnettu
lu frumentu sutta lu lettu
ma la luna di jnnaru
luci comu jornu chiaru.

Signuruzzu chiuviti, chiuviti
ca l'arburelli su morti di siti
e si acqua 'un nni mannati
semu persi e cunsumati

L'acqua di ncelu sazìa la terra
funti china di pietàti,
li nostri lacrimi posanu nterra
e Diu nni fa la carità.

Nesci nesci suli suli
pi lu santu Sarvaturi
jetta un pugnu di nuciddi
arricrìa li picciriddi
jetta un pugnu di dinari
arricrìa li cristiani
'etta un pugnu di fumeri
arricrìa li cavaleri.



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org