Lingua   

Ai Martiri di Cravasco

Buby Senarega
Lingua: Italiano (Ligure Genovese)




Quello strazetto da crave
fra stecchi nûi e spinoni
che verso a çimma o s'asbria,
a stradda a l'è ch'àn battûo
in quella tetra mattin.
Cianzéivan finn-ai rissêu;
cianzéiva l'ægua in to scûo
a-o fondo ai canaloin…
Me pâ sentî i so passi
luveghi comme un tamburo
lenti, che scûggian indietro
cö mutilòu in sce-e spalle;
ï veddo cazze, stä sciù…
perché stan sciù se fra poco
cazzian poi tutti lasciù!…
Han ciammòu Dio in aggiûtto
con ogni colpo do chêu
pe lô, pe-a so moæ, pe-i figgêu,
ma o fî o se fæto ciù cûrto
e a raffega a-a fin a l'à streppoù.
Perché in te grandi ingiustizie
Dio o l'è sempre lontan?
E çerco i gïo ai mæ passi
se un segno o fosse restòu;
no gh'è che i pochi fioretti
che in sce-o sentë n'han lasciòu,
poi in strassetto de fêuggia
secca ch'a sbatte a unna ramma…
Dunque o dolore o se perde
comme da sabbia in to vento?…
Ma in ta gran paxe di monti
se sente l'eco de l'ægua
lontann-a ch'ai ciamma, ch'ai ciamma…



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org